Qazaxıstan, Astana, 13 avqust / Trend , müxbir K.Konırova /
Qazaxıstanda təkcə ilin birinci yarısında "KazMunayQaz" Milli Şirkəti Səhmdar Cəmiyyətinə (MŞ SC) aid neft kəmərlərinə 69 qanunsuz müdaxilə faktı qeydə alınıb. Bu barədə Trend -ın xüsusi müxbirinə MŞ-nin mətbuat xidmətindən bildirilib.
"MŞ-nin iki filialı - Şərq və Qərb filialı üzrə ilin birinci yarısında neft kəmərlərinə 69 qanunsuz müdaxilə faktı qeydə alınıb. Dəymiş ziyanın məbləği 236 milyon təngəni ötüb ($1 150,7 təngədir - müəl.)", - mətbuat xidmətindən deyilib.
Mətbuat xidmətinin məlumatına görə, son beş il ərzində belə cinayətlərin artımında tendensiya var. Belə ki, 2005-ci ildə "KazMunayQaz"ın Şərq və Qərb filiallarının neft kəmərlərinə 43 qanunsuz müdaxilə halı qeydə alınmışdısa, 2008-ci ildə bu rəqəm iki dəfə artıb: Qərb filialında bu göstərici 91-ə, Şərq filialında isə 131-ə çatıb.
Mətbuat xidmətinin məlumatına görə, ümumilikdə 2004-2009-cu illərdə KMQ-nin neft kəmərlərinə 362 qanunsuz müdaxilə faktı qeydə alınıb.
"Qanunsuz müdaxilə və ona qarşı mübarizə bu il sentyabrın sonunda Astanada keçiriləcək "Qazaxıstan Enerji Həftələri" (Kazakhstan Energy Week) çərçivəsində müxtəlif ölkələrdən olan neftçilərin müzakirə mövzularından biri olacaq", -"KazEnergy"-nin Təşkilat Komitəsindən məlumat verilib.
"Bu gün "qara qızıl"ın oğurluğu problemdir. Bu problem istehsalçı ölkələr kimi neft istehlakçısı olan ölkələri də narahat edir", - Təşkilat Komitəsindən deyilib.
Məqalə müəllifi ilə əlaqə ünvanı: [email protected]
