Azərbaycan, Bakı, 14 sentyabr / Trend , müxbir E.İsmayılov /
Azərbaycanın "Şahdəniz" yatağının işlənməsinin ikinci mərhələsi çərçivəsində qazın ixracı məsələsi açıqdır. Bu barədə StatoilHydro Russia şirkətinin prezidenti Benqt Li Hansen deyib. Məlumatı Reuters yayıb. StatoilHydro "Şahdəniz" yatağının işlənməsinin kmomersiya operatorudur.
"Yatağın kommersiyalaşdırılması məqsədi ilə biz daima bütün imkanları öyrənirik, buna görə də biz şirkət üçün daha yaxşı kommersiya vəziyyəti yaradacaq həll seçəcəyik", - Hansen deyib.
"Şahdəniz" yatağının işlənməsi üzrə tərəfdaşlar (onlar arasında BP də var) layihənin ikinci mərhələsi çərçivəsində qazı Rusiyaya, yoxsa "Nabukko" tərəfdaşlarına satacaqlarmı" sualına cavab olaraq Hansen deyib ki, optimal variant axtarırıq, bu da o deməkdir ki, bu məsələ açıqdır.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LUKoil - 10 faiz, TPAO - 9 faiz, SOCAR - 10 faiz. "Şahdəniz"in birinci mərhələsi çərçivəsində çıxarılan qaz Gürcüstanın neft-qaz korporasiyasına, Botaş və BTC Ko.-ya satılır. Azərbaycan da qaz alıcısı qismində çıxış edir.
Dəyəri 7,9 mlrd. dollar avro olan "Nabukko" qaz kəməri qazın Xəzər regionundan Aİ ölkələrinə tədarükünü nəzərdə tutur. Qaz kəmərinin inşasına 2011-ci ildə, ilkin ixracata isə 2014-cü ildə başlamaq planlaşdırılır. Boru kəmərinin maksimal gücü ildə 31 milyard kubmetr təşkil edəcək.
Qaz kəmərinin inşası üzrə konsorsiumda OMV Gas GmbH (Аvstriya), Botaş (Türkiyə), Bulgargaz (Bolqarıstan), S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan), RWE (Almaniya) iştirak edir.
Məqalə müəlifi ilə əlaqə ünvanı: [email protected]
