Azərbaycan, Bakı, 15 sentyabr / Trend , müxbir E.İsmayılov /
"İran layihələşdirilən Nabukko qaz kəmərini şəxsi qazının Avropaya ixracı üçün əlverişli marşrut hesab edir, lakin ölkə üçün bu, yeganə variant deyil", - İran Milli Qaz Şirkətinin nümayəndəsi Həsən Torbaçı deyib.
"Hazırda biz Nabukko-da qalmaq və bu boru kəmərinə necə qoşulmaq üzərində düşünürük. Layihə İranın qoşulmasını (Nabukkoya) nəzərdə tutacaqsa, buna müsbət yanaşacağıq. Belə olmasa, başqa variantlar axtaracağıq", - Torbaçı çərşənbə axşamı Bakıda deyib.
Onun sözlərinə görə, İran qazının Avropaya daşınmasının variantlarından biri Türkiyə ərazisindən çəkiləcək Fars boru kəməri olacaq.
"İran mövcud boru kəmərləri sistemi vasitəsilə Avropada artan qaz tələbatının ödənilməsi üçün kifayət qədər qaz ehtiyatına malikdir", - Torbaçı deyib.
BP-nin məlumatına görə, 2008-ci il yanvarın 1-nə İranın təsdiq edilmiş qaz ehtiyatı 29,61 trilyon kubmetrdir.
Dəyəri 7,9 mlrd. dollar avro olan Nabukko qaz kəməri qazın Xəzər regionundan Aİ ölkələrinə tədarükünü nəzərdə tutur. Qaz kəmərinin inşasına 2011-ci ildə, ilkin ixracata isə 2014-cü ildə başlanılması planlaşdırılır. Boru kəmərinin maksimal gücü ildə 31 milyard kubmetr təşkil edəcək.
Layihənin iştirakçıları OMV Gas GmbH (Аvstriya), Botas (Türkiyə), Bulgargaz (Bolqarıstan), S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan), RWE-dir (Almaniya). İştirakçıların hər biri bərabər - 16,67 faiz paya malikdirlər. Laihənin ümumi dəyərinin 30 faizinə pay iştirakı əsası ilə Nabucco Gas Pipeline International sərmayə qoyacaq, qalan 70 faiz isə kreditlər hesabına ödənəcək.
