Qazaxıstan, Astana, 25 sentyabr / Trend , müxbir K.Konırova /
2020-ci ilə Aİ ölkələrinin 200 milyard kubmetr qaza tələbatı olacaq. "Nord stream" ("Şimal axını") 55 milyardkub metr, "South stream" ("Cənub axını") 30 milyard kubmetr və "Nabukko" 30 milyard kubmetr qaz tədarük edə bilər. Bu rəqəmlər onu göstərir ki, sözügedən layihələr öz aralarında rəqabət apara bilməzlər. Bu barədə cümə günü Astanada "Şimal axını" qaz kəməri layihəsi ilə məşğul olan "Nord stream" şirkətinin Səhmdarlar Komitəsinin sədri, Direktorlar Şurasının üzvü Gerhard Şröder deyib.
"Avropa İttifaqının gələcək ehtiyaclarını nəzərə alaraq, bizə bütün boru kəmərləri lazımdır", - Şröder deyib.
Nabucco Gas Pipeline konsersiumu hesab edir ki, Aİ-nin 27 ölkəsi 2030-cu ilə bu növ yanacağa ümumi tələbat ildə 100 milyard kubmetrlik daxili hasilatla 700 milyard kubmetrə çatdıqda qazın 85 faizini idxal etməyə məcbur olacaq.
"Aİ-nin 27 ölkəsində tələbat və hasilat arasındakı fərq 2030-cu ilə 600 milyard kubmetr qaza çatacaq", - 2009-cu ilin üçüncü rübü ərzində "Nabukko" boru kəməri layihəsinin inkişafı üzrə konsorsiumun məruzəsində deyilir.
Konsorsium ümid edir ki, "Nabukko" qaz kəməri Aİ-ni Xəzər regionu, Yaxın Şərq və Misirdə çıxarılan 82,68 milyard kubmetr həcmindəki qazla təmin edə bilər.
"Nabukko" qaz kəməri layihəsinin dəyəri 7,9 milyard avro qiymətləndirilir. Boru kəmərinin maksimal gücü ildə 31 milyard kubmetr təşkil edəcək.
Layihənin iştirakçıları OMV Gas GmbH (Аvstriya), Botaş (Türkiyə), Bulgargaz (Bolqarıstan), S.N.T.G.N. Transgaz S.A. (Rumıniya), MOL Natural Gas Transmission Company Ltd. (Macarıstan) və RWE-dir (Almaniya). İştirakçıların hər biri bərabər paya - 16,67 faiz paya malikdirlər.
Qaz kəmərinin inşasına 2011-ci ildə, ilkin ixracata isə 2014-cü ildə başlamaq planlaşdırılıb.
Məqalə müəllifi ilə əlaqə ünvanı: [email protected]