Azərbaycan və Rusiya arasındakı qaz infrastrukturunun texniki hazırlığı başa çatmaq üzrədir - ARDNŞ prezidenti
Azərbaycan, Bakı, 11 noyabr / Trend , müxbir E.İsmayılov/
Azərbaycan qazının Rusiyaya tədarükü çərçivəsində iki ölkə arasında olan qaz infrastukturunun texniki hazırlığı başa çatma mərhələsindədir. Bu barədə ARDNŞ prezidenti Rövnəq Abdullayev çərşənbə günü Azərbaycanın neft-qaz sahəsindəki işçilərə dövlət mükafatının təqdim edilməsi mərasimində bildirib.
"Rusiya istiqamətində bütün hazırlıq işləri, o cümlədən revers rejimə keçid, əlavə qaz birləşdirmələrinin köçürülməsi başa çatmaq üzrədir. Həmçinin Quba rayonunda çay keçidinin təmiri aparılmalıdır və biz artıq burada təmir işlərinə başlamışıq", - o deyib.
Abdullayev bildirib ki, Rusiyaya qaz tədarükü alqı-satqı müvaviləsinə uyğun olaraq gələn ilin yanvarından başlayacaq.
Azərbaycan qazının Rusiyaya alqı-satqısı üzrə ortamüddətli müqavilə oktyabrın 14-də Bakıda imzalanıb. Müqavilə ARDNŞ ilə "Qazprom" şirkəti arasında imzalanıb, 2010-2014-cü illəri əhatə edir. Müqaviləyə uyğun olaraq, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək.
Hazırda Azərbaycan və Rusiyanı Mozdok-Qazıməhəmməd qaz kəməri birləşdirir.
Əvvəllər ARDNŞ-nin yüksək vəzifəli nümayəndəsinin verdiyi məlumata görə, müqavilə çərçivəsində 2010-cu ildə Azərbaycan Rusiyaya 500 milyon kubmetrdən az olmayaraq qaz tədarük edəcək. Onun fikrincə, şirkətin Rusiyaya ixrac edilən qaz həcminin elə birinci ildən bir neçə dəfə artırmaq imkanı olacaq.
Məqalə müəllifi ilə əlaqə ünvanı: [email protected]
