Azərbaycan, Bakı, 19 noyabr / Trend /
2009-cu ilin üç rübü ərzində Azərbaycanda "Şahdəniz" qaz-kondensat yatağından hasil edilən karbohidrogen 4,4 milyard kubmetr qaz və 1,2 milyon ton kondensat təşkil edib. Bu barədə cümə axşamı BP-nin (layihənin operatoru) yayılmış hesabatında deyilir.
Məlumatda qeyd edildiyi kimi, 2009-cu ildə 7,5 milyard kubmetr qaz və 1,9 milyon ton kondensat hasil etmək planlaşdırılır.
"2009-cu ilin yanvar-sentyabrında yatağın dörd quyusundan hasilat stabil davam edib və hasil edilən məhsul Azərbaycan, Gürcüstan və Türkiyə ilə sərhəddəki seçmə məntəqələrə çatdırılıb", - məlumatda deyilir. Yanvar-sentyabrda "Şahdəniz"in orta sutkalıq hasilatı 16,3 milyon kubmetr qaz və təxminən 34 min barel kondensat təşkil edib.
"Növbəti bir neçə il ərzində platformalardan qazılan yeni quyular istismara veriləcək və hasilat tədricən artacaq", - məlumatda vurğulanır. Birinci mərhələ çərçivəsində maksimum hasilat dövründə yatağın hasilatının ildə 8,6 milyard kubmetr qaz və sutkada 45 min barel kondensat təşkil edəcəyi gözlənilir.
"Şahdəniz" yatağının ümumi qaz ehtiyatı 1,2 trilyon kubmetr həcmində qiymətləndirilir.
Layihə iştirakçıları bunlardır: BP (operator) - 25,5%, Statoil - 25,5 %, ARDNŞ - 10%, LUKoyl - 10%, NICO - 10%, Total - 10%, TPAO - 9%.