Bakı, Azərbaycan, 24 fevral / Trend /
Azərbaycan Parlamenti indiki yaz sessiyası müddətində Xəzərin Azərbaycan sektorundakı "Bahar" və "Qum dəniz" yataqlar blokunun kəşfiyyatına, işlənməsinə və hasilatın pay bölgüsünə dair müqaviləni ratifikasiya edə bilər.
"Hazırda müqavilə parlamentə ratifikasiyaya təqdim olunmaq üçün hazırlanır. Digər məsələlərlə yanaşı, ratifikasiya PSA tipli müqavilənin qüvvəyə minməsi üçün zəruri olan komponentlərdən biridir", - deyə çərşənbə günü neft-qaz bazarındakı mənbə bildirib.
PSA tipli müqavilə 2009-cu ilin dekabrında ARDNŞ (Azərbaycan Respublikası Dövlət Neft Şirkəti) və BƏƏ-də Jebel Ali XİZ ərazisində qeydiyyata alınmış Bahar Energy Limited şirkəti tərəfindən imzalanıb. ARDNŞ-in iştirak payı 20 faiz, Bahar Energy Limited-in iştirak payı 80 faizdir.
İmzalanmış müqavilə iki hissədən ibarətdir: birinci "Bahar" və "Qum dəniz"də hasilatın reabilitasiyasını və stabilləşməsini , ikinci "Bahar-2" perspektiv strukturunda kəşfiyyat işlərinin aparılmasını nəzərdə tutur.
"Bahar" və "Qum dəniz" yataqlarında 50 yeni quyunun qazılması, gələcəkdə isə 100 quyuda təmir-bərpa işlərinin aparılması planlaşdırılır. ARDNŞ hesab edir ki, xarici kapitalın cəlb olunması qısa müddətdə bu yataqlarda neft və qaz hasilatının stabilləşməsinə və qalıq ehtiyatlarının artırılmasına imkan yaradacaq.
"Bahar-2" strukturunda kəşfiyyat dövründə (üçillik) minimum bir kəşfiyyat quyusu qazılacaq", -mənbə bildirib.
1955-ci ildən istismar edilən "Qum dəniz" yatağı Bakının 21 kilometr cənub-şərqində yerləşir. Bu müddətdə yataqda 30 milyon tona yaxın neft, 27 milyard kubmetr qaz çıxarılıb.
"Bahar" yatağı 1969-cu ildən işlənilir və Bakıdan 40 kilometr cənub-şərqdə yerləşir. Bu müddətdə yataqdan 16,8 milyon tondan çox neft, 128 milyard kubmetrdən çox qaz hasil edilib.
Müqavilə 25 il müddətinə bağlanıb və növbəti beş il üçün uzadılması mümkündür. İlkin mərhələdə ARDNŞ-in mənfəət karbohidrogenlərinin payı 40 faiz təşkil edəcək və gələcəkdə 90 faizədək artırılacaq. İlkin hesablamalara görə, müqaviləyə qoyulacaq investisiyaların həcmi bir milyard dollar təşkil edəcək.
Bu yataqlar blokundan hasilat 70 faiz yeni platformalarda həyata keçiriləcək.
