Azərbaycan, Bakı, 24 fevral / Trend , müxbir E.İsmayılov/
Bakı Beynəlxalq Dəniz Ticarət Limanı yanvarda, ötən ilin analoji dövründə daşınmış 234 min ton neft yüklərinə nisbətdə 119 min ton neft yükləri yükləyib. Bu barədə çərşənbə günü Bakı limanındakı mənbə bildirib.
"Yanvarda 119 min ton neft və neft məhsulları daşınıb. Ötən ilin yanvarında bu göstərici 234 min ton təşkil edib", - mənbə deyib.
Onun sözlərinə görə, neft yüklərinin daşınması həcminin azalması Mərkəzi Asiyadan olan neft yüklərinin bir hissəsinin hələ ötən ildə daşınmanın Cross Caspian şirkətinin həyata keçirdiyi Səngəçal terminalına yönəldilməsi ilə izah edilir.
Ümumilikdə, liman yanvarda, 2009-cu ilin yanvarında daşıdığı 414 min ton yükə nisbətdə 364 min ton yük daşıyıb. Ötən ay ərzində daşınmış yüklərin ümumi həcminin 52 tonu quru yüklərin (klinker, koks, metal) payına, 193 min tonu isə bərə yüklərinin payına düşüb.
Mənbənin sözlərinə görə, neft və neft məhsullarının daşınma həcminin azalmasına baxmayaraq, yanvarda quru və bərə yüklərinin daşınma həcmində artım müşahidə olunub. 2009-cu ilin yanvarında bu göstərici müvafiq olaraq 3 min və 177 min ton təşkil edib.
2009-cu ildə Bakı limanı 2,5 milyon ton neft yükləri daşıyıb ki, bu da 2008-ci ildəki göstəricidən 10 faiz aşağıdır. 2009-cu ildə ümumilikdə liman 5,1 milyon ton yük daşıyıb. Ötən ilin yekunlarına görə, on faizlik artım bərə yüklərinin daşınmasında müşahidə olunub. Bu seqmentlə daşımaların həcmi 2,3 milyon ton təşkil edib. Həmçinin, 2008-ci ilə nisbətdə ötən il liman vasitəsilə quru yük daşımalarının həcmi iki dəfə artaraq 300 min tona çatıb.
