Azərbaycan, Bakı, 25 fevral / Trend , müxbir E.İsmayılov/
ARDNŞ (Azərbaycan Dövlət Neft Şirkəti) "Asiman" və "Şəfəq" perspektiv strukturlarına dair təkliflərini BP şirkətinə təqdim edib. Bundan əvvəl həmin strukturlar üzrə memorandum imzalanıb. Bu barədə cümə axşamı ARDNŞ-nin yüksək vəzifəli nümayəndəsi bildirib.
"Bu layihə çərçivəsində kommersiya danışıqları davam edir. Dünən bizim təkliflərimiz BP şirkətinə göndərilib", - ARDNŞ nümayəndəsi bildirib.
Onun sözlərinə görə, məhsulun bölgüsü (PSA) haqqında müqavilənin bağlanması üçün ilk növbədə bütün kommersiya məsələləri həll olunmalıdır.
Bundan əvvəl neft-qaz bazarındakı mənbənin verdiyi məlumata görə, tədqiqat məlumatlarının analizi Azərbaycanın "Asiman" və "Şəfəq" perspektiv dəniz strukturlarında qaz ehtiyatlarının olmasını göstərib.
Hazırda ARDNŞ və BP Bakının 125 kilometr cənub-şərqində yerləşən "Şəfəq" və "Asiman" strukturlarının birgə işlənməsinə dair PSA tipli müqavilənin bağlanmasına dair danışıqlar aparır.
"Çox güman ki, gələcək müqavilə karbohidrogen tipli PSA olacaq. Lakin əgər tədqiqat işləri nəticəsində strukturda məhz qaz ehtiyatlarılnn olması təsdiqlənərsə, müqaviləyə müvafiq əlavə ediləcək", - deyə mənbə bildirib.
2009-cu ilin iyulunda ARDNŞ və BP Londonda "Asiman" və "Şəfəq" strukturlarının birgə kəşfiyyatına və işlənməsinə dair "Qarşılıqlı anlaşma haqqında" memorandum imzalayıblar. Blokda əvvəllər kəşfiyyat işləri aparılmayıb. O, dənizin dərinsulu hissəsində suyun dərinliyinin təxminən 650-850 metr olduğu bir ərazidə yerləşir və kollektorun dərinliyi təxminən 7 min metrdir.
BP "Azəri-Çıraq-Günəşli" neft-qaz yataqlar bloku və "Şahdəniz" qaz-kondensat yatağının işlənməsinə dair layihələrə rəhbərlik edərək Azərbaycanda əsas xarici neft investorudur. BP həmçinin "Bakı-Tbilisi-Ceyhan" boru kəmərinin operatorudur.
