Azərbaycan, Bakı, 23 aprel /Trend, müxbir E.İsmayılov/
Türkiyə ərazisi ilə Bakı - Tbilisi - Ceyhan (BTC) boru kəməri vasitəsilə bu ilin yanvar-mart aylarında 65,8 milyon barel neft nəql edilib. 2009-cu ilin yanvar-mart aylarında bu göstərici 65 milyon barel neft təşkil edib. Bu barədə Türkiyənin "Botaş" Dövlət Boru Şirkətinin rəsmi internet səhifəsində yayılan məlumatda deyilir.
Martda BTC vasitəsilə Türkiyə ərazisi ilə 23 milyon bareldən çox neft nəql olunub. Ötən ilin martında bu göstərici 24,4 milyon barelə yaxın təşkil edib.
Ümumilikdə, 2009-cu ildə BTC kəməri vasitəsilə Türkiyə ərazisi ilə 285,5 milyon barelə yaxın neft nəql olunub. 2008-ci ildə bu göstərici 264,1 milyon barel təşkil edib, 2007-ci ildə isə 210 milyon bareli ötüb.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci il mayın 18-də başlanılıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
Türkiyə ərazisi vasitəsilə İraq - Türkiyə boru kəməri ilə bu ilin yanvar-mart aylarında 39,7 milyon barelə yaxın neft nəql olunub. Martda bu göstərici 12,8 milyon barelə yaxın olub. Ötən il bu boru kəməri ilə 167,6 milyon barel neft nəql olunub. 2008-ci ildə bu göstərici 135,5 milyon barel təşkil edib.
Türkiyə ərazisi vasitəsilə İraq - Qırıqqala boru kəməri ilə yanvar-mart aylarında 2,1 milyon barel neft nəql olunub. Martda bu göstərici 1,63 milyon barelə yaxın olub. 2009-cu ildə İraq - Qırıqqala kəməri ilə 20,2 milyon barelə yaxın neft nəql olunub. 2008-ci ildə bu göstərici 21,4 milyon barel təşkil edib.
Batman - Dördyol boru kəməri ilə bu ilin yanvar-mart aylarında 3,4 milyon bareldən çox neft nəql olunub. Martda bu göstərici 1,18 milyon barelə yaxın neft təşkil edib. Ötən il neft kəmıri ilə 12,2 milyon barel neft nəql olunub. 2008-ci ildə bu göstərici 11,1 milyon barel təşkil edib.