Azərbaycan, Bakı, 3 may /Trend, müxbir A.Bədəlova/
Almaniyanın "Europipe" şirkəti "Nabucco" boru kəməri layihəsinin konsorsium tenderinin xüsusi seçim mərhələsində iştirak edəcək. "Bloomberg" şirkətin nümayəndəsi Marlen Ştilə istinadən yazır.
"Nabucco" konsorsiumu əvvəlcə apreldə boru kəmərinin inşası üçün uzunmüddətli malların tədarükünə dair tenderin xüsusi seçim mərhələsinə başlanılması barədə elan edib. Bütün paketin dəyəri, təxminən, 3,5 milyard avrodur. Xüsusi seçim mərhələsində şirkətlərin iştirakı üçün son müddət mayın 17-dir.
Dəyəri 7,9 milyard avro olan "Nabucco" kəmərinin çəkilişinə başlanılması 2011-ci ildə nəzərdə tutulub. İlk tədarüklərə 2014-cü ildə start veriləcək. Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
"Europipe" şirkəti boru tədarükçü qismində Rusiyanın Şimal Axını qaz kəməri layihəsində də iştirak edir, sözü gedən kəmər üçün şirkət boru kəməri tədarüklərinin 65 faizini təşkil edir.
