...

Azərbaycan, Rumıniya və Gürcüstan "Azerbaijan-Georgia-Romania Interconnector" layihəsi çərçivəsində BM-in yaradılmasına hazırlaşırlar

Energetika Materials 21 May 2010 15:23 (UTC +04:00)

Azərbaycan, Bakı, 21 may /Trend, müxbir E.İsmayılov/

Azərbaycan qazının Qara dənizdən keçməklə Rumıniyaya nəqlinin mümkünlüyünü öyrənməyi nəzərdə tutan birgə müəssisə (BM) bir ay ərzində yaradıla bilər. Bu barədə Azərbaycanın sənaye və energetika naziri Natiq Əliyev məlumat verib.

Bundan əvvəl mayın 12-də Tbilisidə Azərbaycandan maye qazın Avropaya nəqli üzrə Gürcüstan - Azərbaycan - Rumıniya layihəsinin reallaşdırılması məsələsi üzrə iclas keçirilib. İclasda Azərbaycanın energetika naziri Natiq Əliyev, Gürcüstanın energetika naziri Aleksandr Xetaquri və Rumıniyanın iqtisadiyyat, ticarət və biznes naziri Adrean Vidianu iştirak ediblər.

"Düşünürəm, bir ay ərzində bu iş başa çatacaq. Bundan sonra biz sənədləri dövlətdaxili prosedurdan keçməsi - nizamnamənin təsdiqlənməsi üçün hökumətə təqdim edəcəyik. Daha doğrusu, şirkət bir ay ərzində Rumıniyada fəaliyyətə başlamaq üçün qeydiyyata alınmalıdır", - Əliyev bildirib.

Eləcə də, onun sözlərinə görə, yaxın vaxtlarda Buxarestdə Azərbaycan, Rumıniya və Gürcüstan milli şirkətlərinin nümayəndələrinin görüşü baş tutacaq. Orada şirkətin nizamnaməsinin Rumıniya qanunvericiliyinə uyğun müzakirəsi keçirilməlidir.

Əliyevin sözlərinə görə, Gürcüstanda keçirilən görüşdə bu layihə çərçivəsində nəzərdə tutulan işlərin "yol xəritəsi" tam müzakirə olunub. Üç nazirlik bu layihəyə rəhbərlik edəcək, onu əlaqələndirəcək, nəzarət edəcək, toplaşacaq, qəbul edilən qərarları təsdiqləyəcək. BM bu layihənin icraçısı kimi çıxış edəcək. BM-in yaradılmasında əsas məqsəd TİƏ-nin işlənməsi və hazırlanmasıdır. O, tenderin elan edilməsi, podratçının seçimi, maliyyələşmənin cəlb edilməsi üçün bütün zəruri prosedurları aparacaq.

Aprelin 13-də Buxarestdə Azərbaycan, Gürcüstan və Rumıniya tərəfindən "Maye qazın nəqli sahəsində əməkdaşlıq haqqında" memorandum imzalanıb.

Layihə Azərbaycandan maye qazın Gürcüstan ərazisinə çatdırılmasını, bunun üçün Gürcüstan və Rumıniyada maye qaz istehsalı üzrə iki zavodun tikilməsini nəzərdə tutur. Layihənin dəyəri 4-6 milyard avrodur.

Layihə Azərbaycan qazının Gürcüstanın Qara dəniz sahillərinə nəqlini nəzərdə tutur. Bu qaz xüsusi terminalda sıxılacaq və tankerlərlə Rumıniyanın Konstansa limanındakı terminala çatdırılacaq. Sonra maye qaz təbii qaz halına gətiriləcək və ölkə ərazisində mövcud olan qaz infrastrukturu ilə Rumıniya və digər Avropa ölkələrindəki istehlakçılara göndəriləcək.

Memoranduma uyğun olaraq, tərəflər Cənub dəhlizi çərçivəsində Xəzər regionunu Avropa ilə birləşdirən enerji tranziti dəhlizinin yaradılmasına dair niyyətlərini ifadə ediblər; qaz ticarəti və Rumıniyanın yeraltı qaz anbarlarından istifadə, eləcə də energetika sahəsində fəaliyyət göstərən müvafiq strukturlar arasında imkanların genişləndirilməsinin araşdırılması haqda qərar qəbul ediblər. Eləcə də rumın tərəfinin Buxarestdə "Azerbaijan-Georgia-Romania Interconnector" layihəsinin texniki-iqtisadi əsaslanmasının işlənməsi və layihənin texniki, texnoloji, maliyyə və hüquqi aspektlərinin müəyyən edilməsi üzrə şirkətin yaradılması barədə təklifi qəbul edilib.

Xəbər lenti

Xəbər lenti