Аzərbaycan, Bakı, 7 iyul /Trend/
Bu gün Azərbaycan qaz ehtiyatlarının iqtisadi cəhətdən daha əlverişli olan nəqli layihələrini nəzərdən keçirir, - bu barədə çərşənbə günü Azərbaycanın sənaye və energetika naziri Natiq Əliyev deyib.
"Biz bu gün heç kimə rəqib kimi yanaşmırıq və özümüzü kiməsə rəqib hesab etmirik. Biz, sadəcə, iqtisadi cəhətdən daha əlverişli olan layihələrimizi gerçəkləşdirmək istəyirik", - Əliyev deyib.
Onun sözlərinə görə, bu gün qazın nəqli üzrə layihələr geniş şəkildə yayılıb. Azərbaycan hal-hazırda Qara dəniz vasitəsilə Rumıniyaya mayeləşdirilmiş təbii qazın nəqli imkanları layihəsini gözdən keçirir.
Əliyevin dediyi kimi, Azərbaycan hələ ki bu layihəni öyrənir və nəzərdən keçirir, əgər iqtisadi cəhətdən əlverişli və məqsədəuyğun olarsa, ölkəmiz bu layihədə iştirak edəcək.
Hal-hazırda Azərbaycanın təsdiq olunmuş qaz ehtiyatları iki trilyon kubmetrə yaxın təşkil edir. "İndi "Ümid", "Babək" strukturlarında axtarış-kəşfiyyat işləri aparılır və ölkə bu işə böyük ümidlər bəsləyir. Gündəlikdə duran məsələlərdən biri "Abşeron" və "Naxçıvan" kimi böyük strukturların araşdırılmasıdır", - nazir deyib.
Əliyevin sözlərinə görə, bütün işlərin həyata keçirilməsindən sonra, "bizim ehtiyatlar indikindən iki-üç dəfə artıq olacaq".
