Yunanıstan Azərbaycan qazının nəqli üzrə Türkiyə ilə danışıqlar aparacaq - nazir
Azərbaycan, Bakı, 13 iyul /Trend, müxbir A.Bədəlova/
Yunanıstan öz ərazisi vasitəsilə Azərbaycan qazının nəqli üzrə Türkiyə ilə danışıqlar aparacaq. Bu barədə Trend-ə müsahibəsində Yunanıstanın ətraf mühit, energetika və iqlim dəyişiklikləri naziri Tina Birbili bildirib.
"Bizim milli qaz şirkətimiz [DEPA] Türkiyənin "Botaş" şirkəti ilə tranzit sazişinin detalları ilə bağlı danışıqlar apracaq", - Birbili deyib.
Onun sözlərinə görə, iyunun əvvəlində Azərbaycan və Türkiyə arasında imzalanan saziş və DEPA ilə "Botaş" arasında imzalanan saziş Azərbaycan qazının nəqli üzrə tranzit sazişinin imzalanmasına zəmin yaradır.
Azərbaycan qazının Yunanıstana birbaşa tədarükündən danışan Birbili vurğulayıb ki, tədarüklə bağlı konkret müddət hazırda DEPA və ARDNŞ arasında aparılan danışıqların mövzusudur.
Birbilinin dediyinə görə, onun bu yaxınlarda energetika naziri Natiq Əliyevlə Afinada görüşü zamanı Azərbaycan qazının Yunanıstana birbaşa tədarükünün ümumi məqsəd olduğu barədə hər iki nazir razılaşıb.
"Biz qaz şirkətlərimizin bu istiqamətdə səylərinin mümkün olan yerdə dəstəklənməsi barədə razılığa gəlmişik", - Birbili qeyd edib.
Görüş zamanı Azərbaycan qazının Yunanıstana birbaşa tədarükü üzrə danışıqların başlanması barədə qərar qəbul edilib.
