Аzərbaycan, Bakı, 5 avqust /Trend, müxbir A.Bədəlova/
"Nabukko" qaz kəməri layihəsinin operatoru olan Avstriyanın OMV şirkəti layihə ilə bağlı yekun investisiya qərarının bu il və ya gələn ilin birinci rübündə qəbul ediləcəyini gözləyir.
OMV şirkətinin neft-qaz bölməsinin rəhbəri Verner Auliyə istinadən "Energy Intelligence Group"un yazdığına görə, "Nabukko" qaz kəmərinin buraxılış qabiliyyətinin satışa çıxarılmasının ehtimal olunduğu açıq mövsüm (open season) prosesi 2010-cu ilin dördüncü rübünə planlaşdırılıb və üç ay vaxt aparacaq.
Bu prosedurun gedişində layihənin səhmdarları ildə 15 milyard kubmetrədək qaz (qaz kəmərinin ümumi nəql gücünün 50 faizi) alacaqlar, digər 50 faiz isə şəffaflıq prinsipi əsasında bərabər şərtlərlə üçüncü tərəfə təklif olunacaq. "Open season" prosesində bazarın bütün iştirakçıları uzunmüddətli müqavilələrin bağlanması imkanlarını müzakirə edəcəklər.
OMV Azərbaycan və Mərkəzi Asiyadan Aİ ölkələrinə qaz ixracını nəzərdə tutan "Nabukko" qaz kəməririnin çəkilişinin 2011-ci ildə başlanacağına ümid edir. 7,9 milyard avro dəyəri olan boru kəməri ilə ilk tədarüklərə 2014-cü ildə start veriləcək. Boru kəmərinin maksimal gücü ildə 31 milyard kubmetrə bərabərdir.
Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Layihənin həyata keçirilməsinin birinci fazasında qazın əsas tədarükçüləri qismində Azərbaycan və İraq nəzərdə tutulur. Onların hər birindən müvafiq olaraq 8-10 və 8 milyard kubmetr həcmdə qazın tədarük olunacağı gözlənilir.
