Azərbaycan, Bakı, 15 sentyabr /Trend, müxbir А.Axundov/
30 milyard kubmetr qaz tutumlu "Nabukko" kəməri Avropada qaza olan tələbatın beş faizini ödəyir. Bu barədə çərşənbə günü Bakıda "Nabukko" konsorsiumunun direktoru Reynhard Mitçek deyib.
Onun sözlərinə görə, yaxın 5-10 il ərzində Avropaya idxal üçün əlavə 200 milyard kubmetr qaz lazım olacaq.
"Hazırda Avropada qaza olan tələbat 500 milyard kubmetr təşkil edir, 300 milyard idxal olunur. Yaxın 5-10 il ərzində tələbatın 600 milyarda qədər artırılması və daxili Avropa qazı istehsalının 200-dən 100 milyard kubmetrədək endirilməsini gözləyirik. Bu o deməkdir ki, Avropaya idxal üçün əlavə 200 milyard kubmetr qaz lazımdır. Belə güman edirəm ki, bu 200 milyard kubmetrin 100 milyardı maye qaz və 100 milyard kubmetri təbii qazın payına düşür. Hesablasaq görərik ki, "Nabukko" 30 milyard kubmetrlə Avropada qaza olan tələbatın beş faizini ödəyir", - Mitçek deyib.
Onun sözlərinə görə, "Nabukko" layihəsinin əhəmiyyəti ondan ibarətdir ki, Mərkəzi Asiya və Qafqaz bazarlarına Avropaya çıxmağa imkan verəcək.
"Layihə böyük töhfə verməsə də, bazarın rəqabət və satış qabiliyyətinə böyük təsir göstərəcək və Mərkəzi Asiya, Qafqaz bazarlarını Avropa üçün açmağa imkan verəcək. "Nabukko" gələcəkdə Avropanın enerji təhlükəsizliyini təmin etmək məqsədilə bu cür layihələrin həyata keçirilməsi üçün perspektivlər yaradacaq", - Mitçek deyib.
Dəyəri 7,9 milyard avro olan "Nabukko" qaz kəmərinin inşasının başlanması 2011-ci ilə planlaşdırılıb. Onun maksimal gücü ildə 31 milyard kubmetr təşkil edir.
"2011-ci ildə layihənin maliyyələşdirilməsi üzrə bütün məsələlər həll olunacaq", - Mitçek deyib.
Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
