Azərbaycan, Bakı, 7 oktyabr /Trend, müxbir E.İsmayılov/
İğdır (Türkiyə) və Sədərəyi (Naxçıvan Muxtar Respublikası, NMR) birləşdirən yeni qaz kəmərinin inşası layihəsi çərçivəsində kəşfiyyat işləri aparılır. Bu barədə cümə axşamı ARDNŞ-nin (Azərbaycan Respublikası Dövlət Neft Şirkəti) yüksəkvəzifəli nümayəndəsi deyib.
ARDNŞ NMR-in qaz ilə təminatını yaxşılaşdırmaq məqsədilə yeni qaz kəməri tikməyi planlaşdırır. Həmçinin, ikinci qaz kəməri NMR-in İrandan asılılığını azaltmağa və onun enerji təhlükəsizliyini möhkəmləndirməyə imkan verəcək.
Hazırda Azərbaycan NMR-i İran ilə "svop" əməliyyatları hesabına qazla təmin edir. Bu əməliyyatlar çərçivəsində Azərbaycan İrana sutkada 1 - 1,2 milyon kubmetr qaz nəql edir.
Bundan əvvəl ARDNŞ-dəki digər mənbənin verdiyi məlumata əsasən, artıq yeni qaz kəməri layihəsinin texniki-iqtisadi əsaslandırılması hazırlanıb.
Bundan əvvəl Azərbaycan və Türkiyə arasında imzalanmış memoranduma əsasən, yeni İğdır-Naxçıvan qaz kəmərinin inşası üzrə bütün xərcləri ARDNŞ öz üzərinə götürəcək. Qaz kəmərinin uzunluğu 180 kilometr təşkil edəcək (altı qazpaylayıcı stansiya olmaqla).
