Azərbaycan, Bakı, 12 oktyabr /Trend, müxbur İ.Xəlilova/
Növbəti dörd il ərzində Azərbaycanda neft hasilatının həcmi 223 milyon ton təşkil edəcək. Bu barədə çərşənbə axşamı Milli Məclisin plenar iclasında 2011-ci il dövlət büdcəsi layihəsinin müzakirəsində iqtisadi inkişaf naziri Şahin Mustafayev deyib.
"Bu həcm 2011-ci ildə 51,6 milyon neft hasilatı həcminin 2014-cü ildə 62,4 milyon tona qədər artırılması nəticəsində əldə olunacaq", - nazir deyib.
"2011-ci ildə qaz hasilatının həcmi 29 milyard kubmetrdən 32 milyard kubmetrə çatdırılacaq ki, bu da dörd il ərzində 120 milyard kubmetr qaz hasilatı həcmini təmin edəcək", - nazir deyib.
BP şirkətinin qiymətlərinə əsasən, Azərbaycanda neft ehtiyatları yeddi milyard barel, qaz ehtiyatları isə 1,31 trilyon kubmetr təşkil edir.