Azərbaycan, Bakı, 20 noyabr /Trend, müxbir E.İsmayılov/
Yaxın vaxtlarda ARDNŞ (Azərbaycan Respublikası Dövlət Neft Şirkəti) Bakı və Abşeron yarımadasının qaz sisteminin yenidən qurulması və modernləşdirilməsi layihəsi üzrə Avropa şirkətləri E.ON və RWE-nin təqdim etdiyi təkliflərin qiymətləndirmə prosesini başa çatdıracaq. Bu barədə şənbə günü ARDNŞ-dəki mənbə deyib.
"Qiymətləndirmə prosesi hələ ki davam edir. Tezliklə o, başa çatmalıdır və cari ilin sonunadək şirkətlərdən biri ilə müqavilə imzalanacaq", - mənbə deyib. Bakı və Abşeron yarımadasının qaz sisteminin yenidən qurulması və modernləşdirilməsi layihəsinin hazırlığı üzrə işlərə artqı gələn ilin əvvəlində başlamaq planlaşdırılır.
Bakı və Abşeron yarımadasının qaz sistemi ölkədə ən böyüyüdür və 650 minə yaxın abonenti əhatə edir. Onun yenidən qurulması və modernləşdirilməsi üçün mövcud infrastrukturun 90 faizi yenilənməlidir.
