Azərbaycan, Bakı, 23 noyabr /Trend, müxbir E.İsmayılov/
Azərbaycanın "Şahdəniz" qaz-kondensat yatağının işlənməsi layihəsinin operatoru olan Böyük Britaniyanın ВР şirkəti yataqda altıncı hasilat quyusunun qazılmasını başa çatdırıb. Bu barədə çərşənbə axşamı neft-qaz bazarındakı mənbə məlumat verib.
Onun sözlərinə görə, layihə üzrə 7 min metr olan yeni quyunun qazılması 6959 metr dərinlikdə dayandırılıb. Hazırda quyunun mənimsənilməsinə başlanılması üzrə işlərə hazırlıq görülür.
Mənbə deyib ki, yeni quyu gələn il yanvarın ortalarında istismara verilə bilər.
Eləcə də, mənbənin sözlərinə görə, daha bir hasilat quyusu həm satış bazarı tapılanadək, həm də yataqdakı yerdə qalan dörd quyudan birində aparılan təmir dövründə qaz hasilatını balanslaşdırmağa imkan verəcək.
"Şahdəniz"dəki platformadan sutkalıq qaz hasilatı 20-23 milyard kubmetr civarındadır. Yeni quyu istismar olunandan sonra hasilat 25-26 milyard kubmetrə çata bilər.
Yatağın işlənməsinin birinci mərhələsi çərçivəsində hasilatın ən yüksək həddi 8,6 - 9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 16 milyard kubmetrədək çatdırmaq mümkün olacaq.
"Şahdəniz" yatağından hasil olunan qaz Gürcüstana və Türkiyəyə nəql olunur. Layihə çərçivəsində qazın bir hissəsini Azərbaycan da alır.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
