Azərbaycan, Bakı, 13 dekabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Rumıniyanın daxili bazarında neft məhsullarının paylanması üzrə pilot layihəyə hazırlaşır. Bu barədə bazar ertəsi ARDNŞ-nin yüksəkvəzifəli nümayəndəsi bildirib.
Onun sözlərinə görə, bu layihə 16 yanacaqdoldurma məntəqəsinin (YDM) rebrendinqini nəzərdə tutur. Xüsusilə də layihə çərçivəsində Rumıniyanın müəyyən regionları, o cümlədən mərkəzi və şimal-şərqi regionlarını əhatə etmək imkanı var.
"Biz bu layihəyə pilot layihə kimi baxırıq və araşdırmalar göstərib ki, burada kifayət qədər distribusiyanın cəlbedici gəlirliliyi var", - mənbədən bildirilib.
Rumıniyada neft məhsullarının pərakəndə satışı bazarında gerçəkləşə biləcək məhsul mənbəyinə gəldikdə isə ARDNŞ nümayəndəsi qeyd edib ki, hər şey iqtisadi əlverişlilikdən asılı olacaq.
Mənbənin sözlərinə görə, mövcud layihə çərçivəsində müqavilə hələ imzalanmayıb, lakin hazırlanma mərhələsindədir. ARDNŞ-nin layihəsinin məqsədəuyğunluğunu qiymətləndirmək məqsədilə öz rəyini verən məşhur auditor şirkəti cəlb olunub.
Hazırda ARDNŞ-nin Azərbaycan, Gürcüstan və Ukraynada YDM-ləri var.
