Аzərbaycan, Bakı, 23 dekabr /Trend, müxbir E.İsmayılov/
Dekabrın 23-nə olan məlumata görə, ARDNŞ (Azərbaycan Respublikası Dövlət Neft Şirkəti) Rusiyanın "Qazprom" şirkəti ilə imzaladığı müqavilə çərçivəsində ilin əvvəlindən Rusiyaya 800 milyon kubmetr qaz ixrac edib. Bu barədə cümə axşamı neft-qaz bazarındakı mənbə məlumat verib.
Onun sözlərinə görə, hazırda Azərbaycan qazının Rusiya istiqamətində ixrac həcmləri 1,3-1,4 milyon kubmetrə çatır.
ARDNŞ-nin məlumatına görə, yanvar-noyabr aylarında şirkət Rusiyaya 759,4 milyon kubmetrdən çox qaz ixrac edib. Bu göstərici yanvar-oktyabrda 698,64 milyon kubmetr olub. Noyabrda Rusiyaya 60,8 milyon kubmetr Azərbaycan qazı ixrac olunub. Oktyabrda bu göstərici 80,6 milyon kubmetr olub.
Azərbaycan qazının Rusiyaya alqı-satqısı üzrə ortamüddətli müqavilə 2009-cu il oktyabrın 14-də Bakıda imzalanıb. 2010-2014-cü illəri əhatə edən müqavilə ARDNŞ ilə "Qazprom" şirkəti arasında imzalanıb. Müqaviləyə uyğun olaraq, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə tədarükün maksimal həcmi göstərilməyib. ARDNŞ tədarük edə biləcəyi həcm barədə yarım il əvvəlcədən qarşı tərəfi xəbərdar edəcək.
Rusiyaya Azərbaycan qazının tədarükünə bu il yanvarın 1-dən başlanılıb.