Azərbaycan, Bakı, 4 fevral /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağında SDA-06 yeni hasilat quyusu istismara hazırdır. Bu barədə cümə günü neft-qaz bazarındakı mənbə bildirib.
Onun sözlərinə görə, hazırda quyu mühəndis nəzarəti altındadır və onun istsimara veriləcəyi konkret vaxt hələ məlum deyil.
Mənbənin fikrincə, quyunun istismara verilməsində ləngimənin səbəblərindən biri bu mərhələdə yataqda yerləşən platformadakı digər dörd istismar quyusunda qaz həcmlərinin kifayət qədər olmasıdır.
"Bu gün yataqdan hasil olunan qaz həcmləri kifayət qədərdir", - mənbə qeyd edib.
Hazırda yataqda qaz hasilatı dörd quyudan aparılır. "Şahdəniz"dəki platformadan sutkalıq qaz hasilatı 15-23 milyon kubmetr civarındadır. Yeni quyunun istismara verilməsindən sonra hasilat sutkada 25-26 milyon kubmetrə çata bilər.
Yataqda ən yüksək hasilatın 8,6-9 milyard kubmetr həcmində olacağı güman edilir. Proqnozlara əsasən, yatağın işlənilməsinin ikinci mərhələsi çərçivəsində burada qaz hasilatının ildə 25 milyard kubmetrədək artırılacağı gözlənilir.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
