Azərbaycan, Bakı, 7 aprel /Trend, müxbir E.İsmayılov/
May-iyun aylarında ARDNŞ (Azərbaycan Respublikası Dövlət Neft Şirkəti) Xəzərin Azərbaycan sektorundakı "Bulla Dəniz" yatağında dərin kəşfiyyat quyusunun qazılmasını başa çatdıracaq. Bu barədə cümə axşamı ARDNŞ-dəki mənbə məlumat verib.
Onun sözlərinə görə, layihə dərinliyi 6400 metr təşkil edən quyunun dərinliyi hazırda 6300 metrdir.
"İşlərin mayda başa çatdırılması planlaşdırılır, lakin bunun iyunda baş verməsi də mümkündür", - mənbə bildirib.
Proqnozlara görə, yeni quyudan 500 min kubmetrə yaxın qaz və 80 ton qaz kondensatın hasil olunması mümkündür.
Bundan əvvəl ARDNŞ-nin geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadənin dediyinə görə, bu quyu perspektivlidir. Bundan əvvəl Geofizika və Geologiya İdarəsi quyuda baş verən prosesləri müşahidə və nəzarət etmək məqsədilə uzaq müşahidə sistemi olan "RT-Leuza" da quraşdırıb.
Mənbənin sözlərinə görə, kəşfiyyat quyusunun qazılmasının nəticələrindən asılı olaraq, şirkət elə həmin platformadan istismar quyusu qazmağı da planlaşdırır.
"Bulla Dəniz" yatağı 1975-ci ildən istismar olunur. 34 il ərzində yataqdan 62 milyard kubmetr qaz və 11 milyon ton neft və qaz-kondensat hasil edilib.
"Bulla Dəniz" yatağından sutkada 450 min kubmetr qaz hasil edilir. ARDNŞ geoloqlarının fikrincə, bu yataqda qaz hasilatını bir neçə dəfə artırmaq olar.
