Azərbaycan, Bakı, 12 avqust /Trend, müxbir E.İsmayılov/
Sentyabrda "SOCAR Petroleum" şirkəti (ARDNŞ-nin törəmə şirkəti) Bakıda iki yeni yanacaqdoldurma məntəqəsini istifadəyə verəcək. Məntəqələr Babək prospektində yerləşəcək (hərəkətin hər iki istiqamətində). Bu barədə cümə günü ARDNŞ-dən deyilib.
Mənbənin sözlərinə görə, ilin sonunadək şirkətin Bakıda və Abşeronda yanacaqdoldurma məntəqələrinin sayı 20 ədədə çatacaq. Gələn ilin ortalarına onların sayı 26 ədədə çatdırılacaq.
Bu proses başa çatandan sonra ölkə regionlarında yanacaqdoldurma məntəqələrinin tikintisinə başlanılacaq.
On il ərzində Azərbaycanda SOCAR brendi altında yanacaqdoldurma məntəqələrinin sayını 80-100 ədədə çatdırmaq planlaşdırılır.
"SOCAR Petroleum"un səhmdarları ARDNŞ (51 faiz) və ABŞ-ın A.P. International (49 faiz) şirkətidir. "SOCAR Petroleum" 2008-ci il yanvarın 21-də qeydiyyatdan keçib.
Hazırda ARDNŞ Gürcüstanda 70-dən çox yanacaqdoldurma məntəqəsinə sahibdir, Ukraynanın neft məhsullarının pərakəndə satış bazarında işə başlayıb, eləcə də Rumıniyada YDM-lərin açılması üzrə iş aparır.
