Azərbaycan, Bakı, 6 sentyabr /Trend, müxbir E.İsmayılov/
ARDNŞ-nin nəzdindəki "Azərikimya" İstehsalat Birliyi və Türkiyənin neft-kimya kompleksi "Petkim" (ARDNŞ burada səhmlərə malikdir) bir-biri ilə daimi əməkdaşlıq hədəfini güdür. Bu barədə Trend-ə İB-nin rəhbəri Muxtar Babayev bildirib.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün elan edilən tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verəcək.
"Petkim Petrokimya Holdinq" plastik qablaşdırmalar, parçalar, PVC, yuyucu vasitələr istehsal edir və Türkiyədə bu məhsulların yeganə istehsalçısıdır. Şirkət məhsullarının ¼-ni ixrac edir.
Babayev deyib ki, gələcəkdə bu iki kompleksin bir-biri ilə sıx əməkdaşlıq etməsi üçün aktiv iş aparılır və bu iş yalnız məhsul təmin etmək səviyyəsində deyil. Burada bazarda müştərək davranışları hazırlamaq və məhsulun müəyyən keyfiyyətini yüksəltmək kimi mövzular var ki, bunlar bazarda daha çox sahə tutmağa və "Azərikimya"nın istehsalını müasirləşdirməyə və artıq "Petkim"in işlətdiyi yeni texnologiyaları tətbiq etməyə imkan verəcək.
Onun sözlərinə görə, tərəflər mütəmadi olaraq təcrübə mübadiləsi aparır, o cümlədən İB mütəxəssisləri "Petkim" müəssisələrində işləyir.
O bildirib ki, gələn həftə "Petkim" mütəxəssislərindən ibarət qrup Azərbaycana səfər edəcək. Onlar İB işçilərinə idarənin tabeçiliyində olan müəssisələrin modernləşdirilməsinə kömək edəcəklər.
"Petkim çox müasir kompleksdir. Onun təcrübəsi çox mühümdür və biz bu təcrübədən istifadə etməliyik", - Babayev deyib.
