Azərbaycan, Bakı, 16 noyabr /Trend, müxbir A.Axundov/
Azərbaycan Respublikası Dövlət Neft Fondunun (ARDNF) xərcləri 2012-ci ildə 10,82 milyard manat təşkil edəcək ki, onun 9,93 milyard manatı ölkənin dövlət büdcəsinə transfertlərə yönəldiləcək. Trend-in məlumatına görə, bu barədə çərşənbə günü ARDNF rəhbəri Şahmar Mövsümov parlamentin İqtisadi siyasət, Sosial siyasət, Təhlükəsizlik və müdafiə, Təbii ehtiyatlar, energetika və ekologiya, Aqrar siyasət komitələrinin 2012-ci il və sonrakı üç il üzrə dövlət və icmal büdcəsi layihəsinin müzakirələrində deyib.
Onun sözlərinə görə, qalan hissə ölkədə həyata keçirilən 4 əsas iri layihəyə yönəldiləcək. Vəsaitin böyük hissəsi - 252 milyon manat Bakı-Tbilisi-Qars dəmiryolu xəttinin yaradılması layihəsinin həyata keçirilməsinə, Samur-Abçeron suvarma kanalının yenidən qurulmasına 200 milyon manat, qaçqın və məcburi köçkünlərin sosial-iqtisadi vəziyyətinin yaxşılaşdırılmasına 110 milyon manat və Azərbaycan tələbələrinin xaricdə təhsil alması layihəsinin maliyyələşdirilməsinin davam etdirilməsinə 15 milyon manat yönəldiləcək.
Mövsümov deyib ki, hazırda ARDNF-ə 64 milyard dollar daxil olub ki, onlardan 33 milyard dolları yığılıb. Fonda daxil olan yığımın 25 faizi haqqında təyin edilən plankaya rəğmən, hazırda bu göstərici 50 faizi ötüb. Gələcəkdə yığıma yönələn vəsaitlərin payı hər il dəyişəcək.
Mövsümovun sözlərinə görə, qeyri-neft sektorunun inkişafı ölkə iqtisadiyyatının prioritetidir ki, bu da perspektivdə dövlət büdcəsinə transfertlərin həcminin azalmasına gətirib çıxaracaq.
Dövlət Neft Fondu 1999-cu ildə yaradılıb və həmin vaxt onun aktivlərinin həcmi 271 milyon dollara bərabər olub. ARDNF-in nizamnaməsinə əsasən, Fondun vəsaitləri strateji əhəmiyyətli infrastruktur obyektlərin tikintisi və yenidən qurulmasında, eləcə də vacib ümummili problemlərin həllində istifadə edilə bilər.
Fondun əsas məqsədləri bunlardır: iqtisadiyyata mənfi təsirlərin minimallaşdırılması məqsədilə Fondun vəsait və aktivlərini xaricdə yerləşdirməklə müəyyən dərəcədə "holland sindromu"nun qarşısını almaq, vəsaitlərin gələcək nəsillər üçün toplanmasını təmin etmək və ölkədə cari sosial-iqtisadi prosesləri dəstəkləmək.
