Azərbaycan, Bakı, 11 yanvar /Trend, müxbir E.İsmayılov/
Azərbaycan Sənaye və Energetika Nazirliyi yanında Dövlət Qaz Nəzarəti İdarəsi 2011-ci ildə respublika ərazisində hüquqi şəxs və iri müəssisələrin 1121 obyektində qaz təsərrüfatı yoxlamaları keçirib. Bu barədə çərşənbə günü Trend-ə idarənin rəhbəri Asif Zeynalov bildirib.
Onun sözlərinə görə, xüsusilə, ötən ilin mayından dekabra qədər aparılan yoxlamalar nəticəsində 455 obyektdə çatışmazlıq aşkarlanıb. Onlardan 258 obyektə qarşı İnzibati Xətalar Məcəlləsinin 116 və 118-ci maddələrinə əsasən, cərimələr tətbiq edilib. Öz növbəsində, 12 obyektin fəaliyyətinə qadağa qoyulub.
"Yoxlamalar zamanı 660-dan çox obyektdə pozuntu aşkar edilməyib, 362 obyektə isə bir sıra çatışmazlıqları aradan qaldırmaq üçün tövsiyələr verilib", - Zeynalov deyib.
İdarə rəhbərinin sözlərinə görə, ölkə ərazisində belə yoxlamalar 2012-ci il ərzində də davam etdiriləcək.
İdarə hər hansı bir obyektdə yoxlama aparmaq üçün Ədliyyə Nazirliyindən icazə alır, işləri apardıqdan sonra nəticələr barədə nazirlik qarşısında hesabat verir.
Araşdırmalar abunəçilərin qazdan istifadə qaydalarına riayət etmələrini təmin etmək üçün aparılır. Qazdan istifadə qaydalarını pozan istehlakçılara qarşı İnzibati Xətalar Məcəlləsində nəzərdə tutulan cərimələr tətbiq edilir.