Azərbaycan, Bakı, 26 yanvar /Trend, müxbirlər M.Moezi, E.Tarıverdiyeva/
Gələn həftə İran Məclisi (parlament) Aİ-nin tətbiq etdiyi embarqo qüvvəyə minənədək Avropaya neft satışını qadağan edən təklifi qəbul etməyi planlaşdırır. Trend-in məlumatına görə, bu barədə "Mehr" agentliyi Məclisin mətbuat katibi Seyid Emad Hüseynidən sitat gətirir.
Məclis İrana qarşı qəbul edilən hər hansı tədbirə cavab verə bilər. Hüseyni bildirib ki, Aİ onun zəif iqtisadiyyata malik üç üzvü - Yunanıstan, İspaniya və İtaliyanın bir çox hallarda İran neftindən asılı olduğunu yadda saxlamalıdır.
İran neftinin Avropaya idxalında əsas pay - 68 faizə yaxın Yunanıstan, İtaliya və İspaniyaya məxsusdur. Yunanıstanın İrandan "qara qızıl" tələbatının payı 35 faiz təşkil edir. "Financial Times" qəzetinin məlumatına görə, 2011-ci ildə Aİ ölkələri İrandan orta hesabla sutkada 600 min barel neft alıblar.
Bazar ertəsi Aİ-nin 27 ölkəsinin XİN başçıları Brüsseldəki görüş zamanı İrandan neft idxalına embarqonun tətbiqini təsdiqləyiblər. Aİ ölkələrinin İrandan neft və neft məhsulları ixracına qadağanı nəzərdə tutan yeni sanksiyalar paketi çərçivəsində iyulun 1-dək Aİ-nin bütün üzvləri İrandan neft idxalını tam dayandırmalıdırlar.
