Azərbaycan, Bakı, 1 fevral /Trend, müxbir E.İsmayılov/
Azərbaycan Sənaye və Energetika Nazirliyinin alternativ və bərpa olunan enerji sahəsində fəaliyyət üçün xüsusi icazələri ölkə ərazisində bu sahədə işlərin görülməsi üçün tələbdir. Bu barədə çərşənbə günü Trend-ə Sənaye və Energetika Nazirliyi yanında Alternativ və Bərpa Olunan Enerji Mənbələri üzrə Dövlət Agentliyindən bildirilir.
Məlumata görə, bu sahədə iş görmək üçün şirkətlər və investorlar Energetika Nazirliyinə müvafiq icazə almaq üçün müraciət etməlidirlər.
İcazə Dövlət Agentliyində aparılan təhlil və ekspertizalar, təqdim olunan sənəd və təkliflər əsasında veriləcək.
İcazənin verilməsi üzrə dövlət rüsumu 100 manatdır.
Yanvarın 26-da Nazirlər Kabineti mərkəzi icra hakimiyyəti orqanları tərəfindən göstərilən elektron xidmətlərin siyahısına dəyişikliklər edib.
Azərbaycan Sənaye və Energetika Nazirliyinin göstərdiyi xidmətlər siyahısına edilən dəyişikliklərə əsasən, 22.7-ci bənd - "Alternativ və bərpa olunan enerji mənbələri üzrə fəaliyyətə xüsusi icazənin verilməsi" əlavə edilib.
Nazirlər Kabineti 2011-ci il 24 noyabr tarixli "Mərkəzi icra hakimiyyəti orqanları tərəfindən konkret sahələr üzrə elektron xidmətlər göstərilməsi Qaydaları"nın və "Elektron xidmət növlərinin Siyahısı"nın təsdiq edilməsi haqqında 191 nömrəli qərarda dəyişikliklər edilməsi barədə qərar verib. Kabinetin ötən il 24 noyabr tarixli qərarına əsasən, siyahıya 41 dövlət qurumu daxil edilib.
Fevralın 1-nə olan rəsmi məzənnə 0,7863 AZN/USD təşkil edir.
