Azərbaycan, Bakı, 27 avqust /Trend, müxbir E.İsmayılov/
Azərbaycanın sübut edilən və proqnozlaşdırılan neft və kondensat ehtiyatları 8,5 milyard barel təşkil edir. Belə proqnozlar ABŞ Enerji İnformasiyaları Dövlət İdarəsinin (EIA) rəsmi saytında yerləşdirilən məlumatda bildirilir.
Sübut edilən və təsdiqlənən ehtiyatların ümumi həcmindən 6,8 milyard barel Xəzər dənizində olan strukturların, qalan hissəsi isə quruda yerləşən ərazilərin payına düşür.
EİA-nın məlumatlarına görə, Azərbaycanın sübuta yetirilən və araşdırılan qaz ehtiyatlarının həcmi 1,46 trilyon kubmetr təşkil edir ki, onlardan da 1,3 trilyon kubmetri dənizdə olan strukturların payına düşür.
EİA-nın məlumatlarına görə, ümumilikdə Xəzər hövzəsinin (Azərbaycan, Qazaxıstan, Rusiya, Türkmənistan, Özbəkistan və İran) sübuta yetirilən və proqnozlaşdırılan ehtiyatlarının həcmi 48,2 milyard neft və 8,3 trilyon kubmetrdən artıq olaraq qiymətləndirilir.
Xəzərin neft və qaz ehtiyatlarının böyük hissəsi Qazaxıstanın payına düşür. EİA-nın məlumatlarına görə, Qazaxıstanın Xəzər hövzəsində neft ehtiyatları 31,2 milyard barel və qaz ehtiyatları isə təxminən 3 trilyon kubmetr qaz olaraq qiymətləndirilir.