Azərbaycan, Bakı, 18 noyabr /Trend, müxbir E.İsmayılov/
2013-cü ilin yanvar-oktyabrında Azərbaycanda 36,11 milyon ton neft və qaz kondensatı hasil olunub ki, bu da ötən ilin müvafiq dövründəkindən 0,2 faiz çoxdur. Trend-in məlumatına görə, bu barədə Dövlət Statistika Komitəsindən bildirilib.
2012-ci ildə Azərbaycanda cəmi 42,98 milyon ton neft və qaz kondensatı hasil olunub ki, bu da 2011-ci ildəkindən 5,3 faiz azdır.
Məlumata görə, bu ilin yanvar-oktyabrında neft hasilatının əsas həcmi "Azəri-Çıraq-Günəşli" neft-qaz yataqları blokunun və əcnəbi tərəfdaşlarla birgə işlənən "Şahdəniz" qaz-kondensat yatağının payına düşür.
Bu ilin yanvar-oktyabrında qaz hasilatının həcmini 14,62 milyard kubmetrdən artıq əmtəə qazı təşkil edib ki, bu da ötən ilin 10 ayının göstəricisindən 1,9 faiz çoxdur.
2012-ci ildə qaz hasialtı 17,24 milyard kubmetr (səmt qazı istisna olmaqla) təşkil edib. Bu da 2011-ci ilin göstəricisindən 5,4 faiz çoxdur.
