Azərbaycan, Bakı, 10 yanvar /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) 2014-cü ildə SOCAR brendi altında avtomatik mini avtomobil yanacaqdoldurma məntəqələrinin (YDM) tikintisinə başlamağı planlaşdırır. Bunu cümə günü Trend-ə ARDNŞ-dəki mənbə deyib.
Mənbənin sözlərinə görə, bu il Bakıda operatorsuz işləyəcək mini YDM-lərin yaradılması üzrə işlərə başlanılması planlaşdırılır: "Hazırda 7-8 mini YDM-in layihələndirilməsi üzrə işlər aparılır".
Mini YDM-lərin tikintisinin bir sıra üstünlükləri var. Onlar kiçik sahələrdə inşa edilir ki, bu da ənənəvi YDM-lərlə müqayisədə tikinti və montaj işlərinə çəkilən xərcləri azaldır, bundan başqa operatorsuz yanacağı vermək imkanı yaradır, doldurma və ödəniş avtomatik həyata keçirilir və bu, nəticədə yanacağın doldurulması zamanı buraxılış qabiliyyətinin artmasına gətirib çıxarır.
Mənbə qeyd edib ki, yaxın vaxtlarda Bakıda Bayıl qəsəbəsi ərazisində yeni avtomobil yanacaqdoldurma stansiyasının tikintisinə başlamaq planlaşdırılır: "Yeni YDM-in tikiləcəyi ərazi artıq müəyyənləşib. Hazırda rəsmiləşdirmə prosesi aparılır. Bu il bölglərdə SOCAR brendi altında yeni YDM-lərin tikintisi hələ nəzərdə tutulmayıb".