Azərbaycan, Bakı, 16 yanvar /Trend, müxbir E. İsmayılov/
Azərbaycan Respublikası Dövlət Neft Fondu (ARDNF) 2014-cü ildə Azərbaycanda yeni nəsil üzən qazma qurğusunun tikintisi layihəsinə 327,2 milyon dollar investisiya yatırmağı planlaşdırır. Bu barədə cümə axşamı Trend-ə ARDNF-dən deyiblər.
ARDNF-dən bildiriblər ki, 2013-cü ildə Fonddan bu layihənin reallaşdırılmasına 215,6 milyon dollar ayrılıb. ARDNF 2013-cü ildə ümumilikdə yeni qazma qurğusunun tikintisinə 380,57 milyon manat ayırmağı planlaşdırırdı.
Fonddan qeyd ediblər ki, bu, investisiya layihəsidir: "Layihədə 10 faiz iştirak payı ARDNŞ-yə, 90 faizi isə ARDNF-yə məxsusdur".
ARDNF-dən bildiriblər ki, perspektivdə yeni qurğu tikildikdən və istismara verildikdən sonra Fond dividentlər əldə edəcək.
Qeyd edək ki, yeni nəsil ilk qazma qurğusu ARDNŞ-nin ehtiyacları üçün tikiləcək.
