Azərbaycan, Bakı, 8 iyul /Trend, müxbir Emil İsmayılov/
2013-cü ilin yekunları üzrə ARDNŞ-nin (Azərbaycan Respublikası Dövlət Neft Şirkəti) neft satışından gəlirləri 25,32 milyard manat olub. 2012-ci ilin yekunları üzrə bu göstərici 10,13 milyard manata yaxın olub.
Trend-in məlumatına görə, bu barədə şirkətin saytında dərc edilmiş ARDNŞ-nin ötən il üzrə maliyyə fəaliyyəti haqqında hesabatda deyilir. Hesabat "Ernst&Young" şirkəti tərəfindən yoxlanılıb.
Neftin satışından gəlirlər neftin dünya bazar qiyməti ilə dövlətin tənzimlədiyi daxili qiymət arasında yaranan qiymət marjasından müvafiq verginin (30 faiz) çıxılması ilə göstərilir.
Ötən ilin yekunları üzrə ARDNŞ-nin ümumi gəlirləri 38,43 milyard manat təşkil edib. 2012-ci ildə bu rəqəm 17,14 milyard manat olub.
Hesabatda deyildiyi kimi, gəlirlərin ümumi həcmindən 8,95 milyard manat (2012-ci ildə 3,32 milyard manat) neft məhsullarının satışından daxilolmaların, 1,85 milyard manat (2012-ci ildə 2,03 milyard manat) neft-kimya məhsullarının satışından daxilolmaların payına düşüb.
Hesabatda deyilir ki, qaz satışından ARDNŞ 2013-cü ildə 1,4 milyard manat (2012-ci ildə 1,12 milyard manat), gəlir əldə edib. ARDNŞ-in digər gəlirləri 909 milyon manat (2012-ci ildə 558 milyon manat) təşkil edib.
