Azərbaycan, Bakı, 28 oktyabr /Trend, müxbir Emil İsmayılov/
Azərbaycanda 2020-ci ilədək alternativ və bərpa olunan enerji mənbələrinin inkişafı üzrə layihələrin reallaşdırılması üçün 14 milyard manata qədər vəsait tələb oluna bilər.
Trend xəbər verir ki, bu barədə Bakıda Enerji Tənzimləyicilərinin Regional Assosiasiyasının (ERRA) investisiyalar və enerji tənzimlənməsi üzrə 13-cü illik konfransında Alternativ və Bərpa Olunan Enerji Mənbələri üzrə Dövlət Agentliyinin İnvestisiyalar və Strateji inkişaf departamenti rəhbərinin müavini Samir Rəhimov bildirib.
Onun sözlərinə görə, 2015-ci ildə alternativ enerji sahəsində layihələrin həyata keçirilməsi üzrə xərclər 1,04 milyard manat təşkil edəcək: "Həmin vəsait ümumi gücü 299,6 meqavat olan müxtəlif layihələrin reallaşdırılmasına yönəldiləcək. O cümlədən, Naxçıvan, Oğuz, Balakən, Gədəbəy və Neftçalada hibrid və istilik elektrik stansiyalarının yaradılması nəzərdə tutulur".
S.Rəhimov deyib ki, hazırda həmin hibrid stansiyaların tikintisinin texniki-iqtisadi əsaslandırılması hazırlanır.
Hazırda Azərbaycanda enerji sisteminin müəyyən edilmiş gücü 7100 meqavat səviyyəsindədir və 14 istilik, 10 su elektrik stansiyasından ibarətdir.
Elektrik enerjisi istehsalının əsas mənbəyi, yəni 92 faiz qazın, 7,9 faizi su resurslarının, yalnız 0,1 faizi alternativ mənbələrin payına düşür.
İlkin tədqiqatlara görə, Azərbaycanda alternativ elektrik enerjisinin alınması üçün beş il ərzində 100-ə yaxın obyektin tikintisi planlaşdırılır.