Azərbaycan, Bakı, 11 noyabr /Trend, müxbir Emil İsmayılov/
Fransanın "Total" şirkətinin Xəzərin Azərbaycan sektorundakı "Şahdəniz" qaz-kondensat yatağının işlənməsi layihəsindən çıxmasının səbəbi yatağın işlənməsi konsepsiyasının şirkətin maraqlarına cavab verməməsi olub. Trend-in məlumatına görə, bu barədə "The National Business" "Total"ın kəşfiyyat və işlənmə üzrə bölməsinin rəhbəri Arnaud Breuilaka istinadən xəbər verir.
Onun sözlərinə görə, şirkət işlənmə konsepsiyası üzrə planlarını inkişaf etdirsə də, "Şahdəniz" konsorsiumunun qəbul etdiyi sənəd "Total"ı qane etməyib: "Total" layihədə hələ hüquqi olaraq 10 faiz paya sahibdir".
TPAO və "Total Azerbaijan" şirkətləri bu ilin mayında İstanbulda Fransanın "Total" şirkətinin Azərbaycanın "Şahdəniz" dəniz qaz-kondensat yatağının işlənməsi layihəsindəki 10 faizlik iştirak payının alqı-satqısı haqqında müqavilə imzalayıblar.
Müqaviləyə əsasən, Türkiyənin TPAO şirkətinin layihədəki iştirak payı 19 faizədək artırılacaq.
Qeyd edək ki, "Şahdəniz" üzrə tərəfdaşlar aşağıdakı şirkətlərdir: BP - operator (28,8%), ARDNŞ (16,7%), Statoil (15,5%), "Total" (10%), Lukoil (10%), NICO (10%) və TPAO (9%).
