Xəzər Dəniz Gəmiçiliyi İdarəsi Xəzərdə 60 min ton tutumlu tankerlərin inşasını iqtisadi cəhətdən sərfəli hesab etmir. Bu barədə Trend ə Gəmiçilikdən məlumat verilib. Bu tankerlərdən BTC boru kəməri ilə nəqli üçün Qazaxıstan neftinin daşınmasında istifadə edilməsi təklif olunur.
İdarədən bildirilib ki, bu gəmilərdən istifadə etmək üçün böyük vəsait tələb edən əlavə infrastrukturun yaradılması zəruridir. Belə gəmilər Xəzərin heç bir limanına daxil ola bilmir. Buna görə də onların yüklənməsi və boşaldılması üçün yan körpülərin olması və ya onların reyddə yüklənib-boşaldılması vacibdir. "Bunlar çox mürəkkəb proseslərdir və böyük sərmayə tələb edir. Bundan başqa, həm Qazaxıstanda, həm də Azərbaycanda dənizin dibini dərinləşdirmə işləri görmək lazım gələcək", - deyə gəmiçilikdən qeyd ediblər.
Həmçinin, qısa marşrut problemi də mövcuddur. 60 min ton tutumlu tankerlərin yüklənməsi və boşaldılması üçün bir neçə gün lazımdır. Bu müddət ərzində Azərbaycan və Qazaxıstanın balansında olan 13 min ton yük tutumlu tankerlər bir neçə reys həyata keçirə bilər.
Gəmiçilikdə hesab edirlər ki, belə tankerlərin inşasına dair təkliflər dempinqin tətbiqi və qeyri-sağlam rəqabət cəhdidir. Bu gün XDGİ-nin nəqliyyat donanmasına 72 gəmi daxildir. Ümumi tutumu 430,312 ton olan bu gəmilərin 37-si tanker, 35-i quru yük daşıyan gəmi donanmasına daxildir. Gəmiçiliyin balansında 13 min tondan artıq yük daşıma qabiliyyətinə malik "Prezident Heydər Əliyev" tipli 3 tanker var. Oktyabr-noyabr aylarında Bakıya Rusiyanın "Krasnoe Sormovo" (Nijni Novqorod) gəmiqayırma zavodunda inşa edilən bu tipli daha iki tarnker gətiriləcək.
