Trend agentliyinin məlumatına əsasən, "Azəriqaz" SC iki yeni qaz kəməri - Səngəçal-Qaradağ və Səngəçal-Hacıqabul üzrə layihə işlərini başa çatdırıb. Hər iki kəmərin marşrutu seçilib.
Bu kəmərlər həmin layihələrin operatoru BP tərəfindən "Azəri" və "Şahdəniz" yataqlarından hasil olunan qazın qəbulu üçün nəzərdə tutulub.
Hazırda "Azəriqaz" sisteminə "Azəri" yatağından hasil olunan səmt qazı verilir. Mövcud qaz nəqliyyatı xətləri qazın "Azəriqaz" sisteminə daxil olmasına imkan verir. Lakin qazın həcmi və təzyiqi artırıldıqdan sonra həmin qazın qəbulu üçün yeni infrastrukturun yaradılması lazım gələcək.
Səngəçal-Qaradağ boru kəmərinin diametri 1000 mm. təşkil edəcək. Kəmər vasitəsilə Bakı üçün nəzərdə tutulmuş qazın nəqlini gerçəkləşdirmək planlaşdırılır. Səngəçal-Hacıqabul kəmərinin diametri isə 1200 mm olacaq. Bunun vasitəsilə qaz respublika qaz nəqliyyatı sisteminə veriləcək.
Hər iki boru kəmərinin uzunluğu 68 km-dir. Tikintinin ilkin dəyəri 45 mln. dollar həcmində qiymətləndirilir.
