2006-cı il noyabrın əvvəlində Pekində (Çin) neft hasilatı və emalı sahəsi üzrə mütəxəssislərin konfransı keçiriləcək. Bu barədə Trend ə Salyan Oil şirkətindən xəbər veriblər.
May ayında Çinin CNPC şirkətinin nümayəndə heyətinin Bakıya səfəri olub. Şirkət Sənaye və Energetika Nazirliyində və Dövlət Neft Şirkətində görüşlər keçirib. İndi isə şirkət Azərbaycan mütəxəssislərini konfransda iştirak etməyə dəvət edib.
Bu cür konfrans dünyada ilk dəfə keçiriləcək. Konfransda ağır neftlərin işlənməsindən emalına qədər effektiv istifadə məsələləri müzakirə olunacaq. Burada ağır neftlərin hasilatı və emalı sahəsində Azərbaycan mütəxəssislərinin çıxışı gözlənilir. Bütövlükdə, görüşdə dünyanın 500-dən artıq şirkəti iştirak edəcək.
CNPC Azərbaycanda quruda yerləşən iki müqavilə sahəsinin: "Kürsəngi- Qarabağlı" və "Cənub -qərbi Qobustan"ın operatorudur. Bu sahələr Salyan Oil əməliyyat şirkəti tərəfindən tədqiq olunur.
