İlkin hesablamalara görə, region ölkələri 2027-ci ilədək Bakı-Tiflis-Ceyhan boru kəmərinin istismarından mənfəət vergisi kimi $2,104 mlrd alacaq. Trend in "Vergilər" qəzetinə istinadən xəbər verdiyi kimi, ARDNŞ-in vitse-prezidenti Şahin Mustafayev bildirib ki, bu vəsaitlərin $625 mln Azərbaycanın, $517 mln - Gürcüstanın, $961 mln - Türkiyənin payına düşür.
Hesablamaların modelinə görə, tərəfdaşların BTC layihəsi üzrə əməliyyat fəaliyyətindən $9,123 mlrd mənfəət vergisi alacağı gözlənilir. Azərbaycan tərəfi layihədə 25% iştirak payına malikdir. Azərbaycanı təmsil edən AzBTC Limited-in səhmlərinin 30%-i ARDNŞ-ə, 70% isə İqtisadi İnkişaf Nazirliyinə məxsusdur. "AzBTC Limited-in əldə edəcəyi xalis mənfəət təxminən $2,281 mlrd qiymətləndirilir", - deyə Ş.Mustafayev qeyd edib.
