BTC Co boru kəməri şirkəti Bakı-Tbilisi-Ceyhan neft kəmərinin daşıma qabiliyyətinin sutkada 500 min barelə qədər çatdırılması üzrə texniki işləri başa çatdırıb. Bu barədə Trend ə ARDNŞ-dən məlumat verilib. Boru kəməri ilə vaxtaşırı olaraq sutkada 500 min barel neft nəql olunur.
"Lakin həmin sutkalıq həcmlər daimi deyil və 200 min barelə qədər düşə və 500 min barelə qədər qalxa bilər", - deyə ARDNŞ nümayəndəsi bildirib.
Hazırda boru kəmərinin nasos stansiyalarında dizel yanacağın istifadə olunur. Ehtimal olunur ki, gələcəkdə qurğular qazla işləyəcək və həmin qaz BTC Co şirkəti tərəfindən "Şahdəniz" yatağından əldə olunacaq.
BP-nin məlumatlarına görə, 2006-cı ilin yanvar-avqust aylarında Bakı-Tbilisi-Ceyhan (BTC) boru kəməri ilə 2 mln. 373,6 min ton neft ixrac olunub, yanvar -iyul aylarında isə bu göstərici 1 mln. 259,8 min ton olub. Avqust ayında BTC boru kəməri ilə 1 mln. 114 min ton neft ixrac olunub, iyun ayında isə həmin göstərici 779,791 min ton təşkil edib.
