Rusiyanın daxili suları bağlananadək Xəzərdən çıxmaq məqsədi ilə "Markab" tədqiqat gəmisi naviqasiyanın sonuna - noyabrın ortalarına kimi Xəzərin Azərbaycan sektorunda işləri başa çatdırmaq niyyətindədir. "Azeri-Fugro" Azərbaycan-Niderland Birgə Müəssisəsindən Trend ə verilən məlumata görə, işlər təxminən noyabrın 8-nə kimi başa çatdırılmalıdır.
Bir qədər əvvəl gəminin dizel mühərriklərində təmir işləri başa çatdırılıb. Təmir 4 günə yaxın davam edib. Gəmi "Fugro" şirkətinə məxsusdur.
Bu gəmi vasitəsi ilə "Şahdəniz" yatağında tədqiqatlar aparılır. İşlər qruntun mühəndis xüsusiyyətlərinin tədqiqinə yönəldilib. Cəmi 12 geotexniki quyunun qazılması nəzərdə tutulub. Onların bir hissəsi 30, digər hissəsi isə 150 metr dərinlikdə qazılacaq.
