Noyabrın ortalarında BP Azerbaijan şirkəti "Şahdəniz" qaz-kondensat yatağında qazılmış birinci quyudan təbii qaz hasilatına başlamağı planlaşdırır. Bu barədə Trend ə Azərbaycanın Sənaye və Energetika Nazirliyindən məlumat verilib.
BP Azerbaijan şirkəti "Şahdəniz" layihəsinin operatorudur. Digər xarici tərəfdaşlarla yanaşı, ARDNŞ də layihənin iştirakçısıdır.
İdarə nümayəndəsinin sözlərinə görə, dekabrın ortalarında yataqda ikinci quyu istismara veriləcək ki, bu da qaz hasilatını artırmağa imkan verəcək.
ARDNŞ-in məlumatına görə, bu il yataqdan təxminən 1,2 mlrd. m3 qaz hasil etmək planlaşdırılır.
"2007-ci ildə daha iki quyu "Şahdəniz" yatağından qaz hasilatına qoşulacaq", - deyə nazirlik nümayəndəsi qeyd edib. Gələn il "Şahdəniz" yatağından 5,5 mlrd. m3-dək yanacaq hasil oluna bilər.
Müqaviləyə görə, yataqdan hasil edilən qaz Azərbaycan, Türkiyə və Gürcüstanda, kiçik bir hissə isə BTC Co şirkətinə satılacaq.
