Azərbaycan Beynəlxalq Əməliyyat Şirkəti (ABƏŞ - BP Azerbaijan şirkətinin operatoru) "Azəri"-"Çıraq"-"Günəşli" (AÇG) yatağında neftin hasil olunduğu "Fasilə dəstəsi"ndən yuxarıda yerləşən qatlardan qazın əldə olunması imkanını nəzərdən keçirir. Bu barədə Trend xəbər verir.
Bu qazın hasilatı onun geriyə - laya vurulmasına imkan yaradacaq və bu, "AÇG"də neft hasilatının "plato nöqtəsi"ndə uzun müddət saxlanılması və artırılmasına səbəb olacaq.
Ekspertlərin qiymətləndirmələrinə görə, AÇG-də əlavə qaz ehtiyatları Balaxanı dəstəsində ola bilər. Hazırda bu layihənin reallaşdırılmasının müxtəlif konsepsiyaları nəzərdən keçirilir.
"Fasilə dəstəsi"ndən yuxarıdakı qatlardakı işlər yeni müqavilənin bağlanmasını tələb etmir.
Ekspertlərin qeyd etdiyi kimi, hazırda Azərbaycan Dövlət Neft Şirkəti "Günəşli"nin dayaz sulu hissəsində Balaxanı dəstəsini tədqiq edir.
Bu il ARDNŞ Balaxanı dəstəsində qəbul olunmuş proqram çərçivəsində qaz hasilatının artırılması üçün 13-20 quyu qazmaq niyyətindədir.
AÇG layihəsində sazişin iştirakçıları BP (operator - 34,1 faiz), Chevron (10,2 faiz), ARDNŞ (10 faiz), INPEX (10 faiz), Statoil (8,6 faiz), ExxonMobil (8 faiz), TPAO (6,8 faiz), Devon (5,6 faiz), ITOCHU (3,9 faiz) və Hess şirkətidir (2,7 faiz).
