Astana, Qazaxıstan /müx. Trend K.Konırova/ 2030-cu ilədək dünya bazarlarına təbii qazın çatdırılması artacaq. Bu, əsasən Rusiya və Xəzər bölgəsi hesabına baş verəcək. Bu sözləri Astanada ABŞ-ın "ExxonMobil" şirkətinin eksperti Skott Nauman deyib.
"2030-cu ilədək dünyanın bütün regionlarında elektrik enerjisi hasilatı və digər məqsədlər üçün təbii qaza olan tələbat artacaq" - deyə Nauman bildirib.
Onun sözlərinə görə, 2030-cu ilədək Qərbi Avropanın yataqlarında hasilat səviyyəsinin xeyli azalacağı gözlənilir.
"Artan tələbatı ödəmək üçün boru kəmərlərlə ötürülən qazın həcmi qəfil aratacaq. Bu, əsasən Rusiya və Xəzər regionundan gələn qaza aiddir" - deyə o qeyd edib.
Məlumat üçün bildirək ki, Azərbaycan "Şahdəniz" yatağından hasil edilən qazın Gürcüstan və Türkiyəyə ixracı üçün nəzərdə tutulan Cənubi-Qafqaz qaz kəmərinin tikintisini artıq yekunlaşdırıb.
Transxəzər qaz kəmərinin tikintisindən və onun Cənubi-Qafqaz qaz kəmərinə qoşulmasından sonra sonuncu ilə Qazaxıstan və Türkmənistan qazı Avropa bazarlarına ötürüləcək. Transxəzər kəmərinin illik ötürücülük qabiliyyəti 20 mlrd. kubmetr təşkil edə bilər.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
