Azərbaycan, Bakı/ Trend müxbir S.Əliyev/ Noyabrın 8-də Bakıda MDB ölkələri "Metro" Beynəlxalq Assosiasiyasının toplantısı keçiriləcək. Bu barədə çərşənbə günü jurnalistlərə Bakı Metropoliteninin rəisi Tağı Əhmədov məlumat verib.
Beynəlxalq "Metro" Assosiasiyası 1992-ci ilin fevralında yaradılıb. Assosiasiya Beynəlxalq İctimai Nəqliyyat Birliyinin (BİNB) həqiqi üzvüdür və BİNB-nin metropoliten komitəsinin, həmçinin digər beynəlxalq tədbirlərində bütün beynəlxalq topantılarında üzvlərinin şəxsində təmsil olunmaq hüququ var.
Hazırda Assosiasiyanın üzvləri sırasında Rusiya və MDB metropolitenləri (Moskva, Sankt-Peterburq, Samara, Yekaterinburq, Novosibirsk, Nijni Novqorod, Tiflis, Daşkənd, Bakı, İrəvan, Kiyev, Xarkov, Dnepropetrovsk, Minsk), həmçinin "Metrovaqonmaş" QSC, "Dinamo-Plyus" QSC, "Vaqonmaş" QSC, "Kryukovski vaqonqayırma zavodu" ASC (Ukrayna) var.
Assosiasiyanın fəaliyyəti Rusiya və MDB metropolitenləri arasında inteqrasiya əlaqələrinin möhkəmlənməsi, təcrübə mübadiləsi, qanunvericilik təşəbbüsləri və qanun layihələrinin müzakirəsinə yönəlib.