Azərbaycan, Bakı / Trend müxbir S.Babayeva/ Azərbaycanın rabitə və informasiya texnologiyaları naziri Əli Abbasov cümə axşamı hökumətin İT sahəsində 2008-ci il üçün elan etdiyi prioritetləri açıqlayıb.
Nazirin sözlərinə görə, gələn il ölkə üçün mühüm olan regional innovasiya zonasının yaradılması layihəsinin reallaşmasına başlanacağı gözlənilir.
Nazirin sözlərinə görə, ikinci mühüm layihə ölkənin şəbəkə strukturunda yeni Next Generation Network (NGN) texnologiyasının yaradılmasıdır ki, bu da informasiya ötürülməsində geniş imkanlar yaradacaq.
Nazirlik 2008-ci ildə Dünya Bankı və Koreya hökuməti ilə birlikdə "Elektron hakimiyyət" üzrə layihənin reallaşmasına başlamağı planlaşdırır.
"Bununla yanaşı, biz telekommunikasiya sahəsində islahatlar keçirəcəyik" - deyə Abbasov məlumat verib.
Nazirliyin gələn il üçün nəzərdə tutulan planlarına informasya -tranzit mərkəzinin yaradılması və "Trans-Asiya-Avropa" fibrooptik kabel magistralının Xəzər seqmentinin çəkilməsi layihəsinin reallaşmasına başlanması da daxildir.
Hazırda yuxarıda sadalanan layihələr işlənmə mərhələsindədir.
Hökumətin hesablamalarına görə, 2008-ci ildə rabitə sahəsindən əldə olunacaq ümumi gəlirlər 467,1 mln. manat, 2009-cu ildə 551,1 mln. manat, 2010-cu ildə isə 633,8 mln., 2011-ci ildə isə 728,8 mln. manat təşkil edə bilər.
