Azərbaycan, Bakı, 11 fevral / Trend / Azərbaycanın Rabitə və İnformasiya Texnologiyaları Nazirliyi 2008-ci ilin tədbirlər planına əsasən, ilin birinci yarısında 471, 472, 473, 479, 474, 475, 476, 470 indeksli analoq ATS-lərin yenidən qurulmasını başa çatdıracaq.
Mətbuat xidmətinin məlumatına görə, yenidənqurma işləri 2008-ci ilin ikinci yarısında da davam etdiriləcək. Bu dövrü ərzində 438, 439, 494, 495, 493, 498 və 598 ATS-ləri üzrə işlər aparılacaq.
İl ərzində oxşar tədbirlər Yardımlı, İsmayıllı, Ucar, Zərdab, Lerik, Göyçay və Cəlilabad mərkəzi regional ATS-lərində həyata keçiriləcək.
Daha öncə 2007-ci ilin yekununa dair kollegiya iclasında Azərbaycanın rabitə və informasiya texnologiyaları naziri Əli Abbasov ölkədə telefonlaşdırma səviyyəsindən məmnun olmadığını bildirib.
"Aşağı göstərici bizi narahat edir - 2007-ci ildə hər 100 nəfərə 14 stasionar telefon düşüb" - o deyib.
Nazir hesab edir ki, yaranan vəziyyətdən çıxış yolu - əlavə 350 min nömrənin çəkilməsidir.
"Biz bu göstəricini orta dünya səviyyəsinə qaldırmaq niyyətindəyik, bəlkə onu da keçdik" - Abbasov deyib.
Rabitə Nazirliyinin məlumatına görə, 2007-ci ildə Azərbaycanda hər 100 nəfərə 14,62 ədəd stasionar telefon düşüb. Bakı üzrə göstərici 33 ədəd, digər regionlar üzrə - 9,4 ədəd təşkil edib. Kənd yerlərində hər 100 nəfərə 5,7 telefon düşür.
