Azərbaycan, Bakı, 23 may/ Trend / Sabah Mingəçevirdə Rabitə və İnformasiya Texnologiyaları Nazirliyinin təşkil etdiyi seminar keçiriləcək. Bu barədə nazirlikdən məlumat veriblər.
Seminarın məqsədi Azərbaycanda informasiya-kommunikasiya sektorunun inkişaf etdirilməsi, bütün həyat sahələrində İKT-nin tətbiqi üçün əhalinin maarifləndirilməsidir.
Əvvəllər Rabitə Nazirliyi İKT-nin inkişafı məqsədilə Quba, Lənkəran, Tərtər, Naxçıvan və ölkənin digər regionlarında, həmçinin Bakı Dövlət Universitetində və Azərbaycan Dövlət İqtisadi Universitetində seminarlar keçirib.
Mingəçevirdə keçiriləcək seminarda, informatika müəllimləri, dövlət orqanlarının İT-mütəxəssisləri, Mingəçevir, Yevlax, Goranboy, Tərtər, Bərdə, Ucar, Göyçay və Ağdaş rayonlarının TKQ və poçt bölmələrinin nümayəndələri dinləyici qismində iştirak edəcəklər.
Rabitə Nazirliyinin əməkdaşları və İKT sahəsində aparıcı ekspertlər seminarda Azərbaycanda formalaşdırılan informasiya cəmiyyəti və elektron hökumət, elektron imza və elektron ticarət, təhsildə İKT-nin tətbiqi haqqında məruzələrlə çıxış edəcəklər.
